SAFREI

PERFÍL FUNDADOR

　　Savio Freitas ne’e fundadór eskola múzika Safrei. Nia mós eis Jezuita no múziku Timoroan ida ne’ebé akaba ninia mestradu iha edukasaun múzika iha Universidade Elizabeth iha Hiroshima, Japaun. Durante estuda tinan rua iha universidade múzika, nia hetan Prémiu dala rua. Xavier Award nia simu iha tinan 2014 tanba hetan valór di’ak liu iha ninia primeiru ano. Cecilia Award nia simu iha tinan 2015 durante ninia graduasaun tanba nia aprezenta ninia teze mestradu ho kualidade di’ak no hetan mós primeiru lugar entre estudante mestradu sira. Nia sai ema estranjeiru ne’ebé primeiravés hetan award aas liu iha universidade ne’ebé domina ho estudante japonés.

　　Molok ba estuda iha Japaun, Savio mós nu’udar profesór hanorin inglés, istória no múzika tinan rua iha Colégio de São José (2009-2011). Nia mós hetan responsabilidade husi padre jezuita sira hodi hahú harii eskola foun jezuita nian, Colégio de Santo Inácio de Loiola, iha Kasait husi tinan 2011-2012. 

　　Savio remata ninia estudu filozofia iha Ateneo de Manila iha tinan 2009. No durante ninia estudu iha Manila, nia grava múzika no sai albun ida. Entre nia albun ne’e múzika Tetun ida hanesan “Nain Feto Aitara” ne’e mós komesa uza barak iha eventu prosesaun iha Timor.  

　　Agora, alén de harii eskola múzika iha Timor, nia mós komesa halo peskiza, kolekta no estuda kona ba melódia no múzika tradisional Timor nian ne’ebé komesa atu lakon ona. Nia fiar katak Timor nia kultura no múzika tradisional ne’e rikusoin Timor nian no presiza hetan atensaun no prezervasaun atu hametin nafatin Timor nia identidade.